Y7 Prime 2019 و Samsung J6 Plus المقارنة المنتظرة بين

بمناسبة انخفاض سعر Samsung J6 Plus ونزول الموبايل الجديد Huaei Y7 Prime 2019 قررنا نعمل مقارنة ما بينهم وهنتكلم عن كل النقط اللى ممكن يتفوق فيها جهاز عن التانى 

 طبعا هواوى و سامسونج من اكتر الشركات اللى العميل بيثق فيهم وخصوصا فى الفئة الاقتصادية اللى بينتمى ليها الموبايلين

واللى سعرهم متقارب وزى ما يكون فى حرب فى الفئة الاقتصادية على الموبايل اللى ممكن يكون الرائد فى الفئة ديه

وخصوصا فى وجود شركات كتير زى اوببو وشاومى اللى داخلين بقوة فى الحرب ديه و لكن مقارنة النهاردة مابين  Huawei Y7 Prime 2019  و Samsung J6 Plus 

و اول نقطة معانا فى المقارنة هيا مواد التصنيع :

الموبايلين مصنوعين من البلاستيك واللى طبعا زى ما اتعودنا انه صعب الكسر وبيزود من قدرة تحمل الموبايل ولكن ما بيديش احساس ان الجهاز Premium وكمان الموبايلين شبه بعض فى المواد المستخدمة فى التصنيع وكمان متشابهين فى المسكة والالوان اللى موجودة فى الموبايلين ممتازة ويعتبر مفيش اختلاف هنا ممكن يرجح كفة موبايل عن التانى وبكده يبقى تعادل ما بينهم 

و خلينا نروح لي وش الجهاز:

 وهنا نلاقى اول اختلاف وهوا استغلال الشاشة للمساحة الامامية من الموبايل هنا Y7 Prime 2019 بييجى بنوتش صغير من قدام معا حافة سفلية اما ال J6 Plus فبييجى معا حافة من فوق وحافة من تحت وهنا استغلال المساحة ده هيخلى Y7 Prime 2019 شاشة اكبر بحجم 2.5 انش رغم ان حجم الموبايلين تقريبا واحد فى الايد وبكده بكل تأكيد نقطة استغلال المساحة هتروح ل Y7 Prime2019 

اما بالنسبة للشاشة نفسها فهنا  ال J6 Plus واللى بييجى ب شاشة 6 انش و ال Y7 prime بشاشة 6.26 انش اما بالنسبة  بقا لتشبع الالوان واداء الشاشة وخاصة اللون الاسود كل ده لصالح J6 Plus وهوا اللى ياخد النقطة هنا

اما بالنسبة لنقطة الاداء:

هنا الموبايلين بييجو ب3 جيجا بايت رام و32 جيجا بايت زاكرة داخلية ولكن اللى بيختلف فيهم المعالجات واللى بيكون Snapdragon 425 فى J6 Plus اما فى Y7 Prime فبيكون Snapdragon 450 وهنا بكل تأكيد نقطة الاداء هتروح ل Y7 Prime باعتبار ان المعالج احدث اما بالنسبة لتجربة اداء الالعاب هنا لو هتلعب العاب خفيفة مش هيكون فى مشكلة ام لو هتلعب العاب تقيلة زى Pubg مثلا بصراحة الموبايلين مش هيساعدوك اوى حتى لو لعبت على اقل الاعدادات هتلاقى ان فريمات كتير بتقع لكن الغريب رغم الاداء السئ للجهازين هنلاقى ان Samsung J6 Plus بيقع فيه فريمات اقل من اللى بتقع فى Y7 Prime والمفروض اصلا ان العكس هو اللى يحصل خصوصا ان المعالج اقوى فى ال Y7 Prime فتقريبا ديه مشكلة فى السوفت وير فى الجهاز بس فى النهاية لو حابين تلعبوا Pubg بننصحكم انكم تشوفوا جهاز بمعالج اقوى شوية اما السوفت وير فى الموبايلين بييجوا بأندرويد اوريو وكمان ييجى فيهم ميزة الايمائات واللى بتخليك تتحكم او تتنقل فى النظام من خلال السحب بالصباع 

بس J6 Plus بييجى بميزتين مش موجودين فى Y7 Prime :

الاولى انك امكانية انك ممكن تعمل نسختين مختلفتين من نفس التطبيق يعنى ممكن تعمل 2 واتساب او 2 فيسبوك و غيره 

والميزة التانية هيا Floating Window واللى هيا بتخلى التطبيقات عايمة على الشاشة وممكن تحركها فى اى مكان وتصغرها او تكبرها زى منتا عايز و بكده نقطة السوفت وير تروح لل J6 Plus و بكده نكون رجعنا تانى لنقطة التعادل ما بين الموبايلين 

ونروح لنقطة الكاميرات :

بالنسبة للكاميرات الخلفية الJ6 Plus بييجى بكاميرا 13 ميجا بيكسل بفتحة عدسة 1.9 وكاميرا تانية بدقة 5 ميجا للعزل اما الY7 Prime 2019 بييجى بكاميرا خلفية 13 ميجا بيكسل بفتحة عدسة 1.8 وكاميرا اضافية 2ميجا للعزل 

وبالنسبة للكاميرات الامامية 

ال J6 Plus بييجى بكاميرا امامية 8 ميجا بيكسل معا فتحة عدسة 1.9 اما ال Y7 فبييجى بكاميرا امامية 16 ميجا بيكسل معا فتحة عدسة 2.0 

نروح بقا للبطاريات :

هنا ال J6 Plus جاى ببطارية 3300 ميللى امبير اما الY7 Prime 2019 فبييجى بطارية 4000 ميللى امبير وهنا بالتأكيد النقطة ديه هتروح لصالح Y7 Prime 2019 بحكم ان فيه فرق 700 ميللى امبير لصالح الموبايل 

فيه نقطتين هنتكلم عنهم بشكل سريع النقطة الاولى هيا وسائل الحماية اللى موجودة فى الموبايلين :

الموبايلين فيهم بصمة وموجود فيهم Face Unlock او الفتح من خلال التعرف على ملامح الوجه  وهنا الفرق بين الموبايلين فى سرعة البصمة مش حاجة كبيرة اوى يعننى فيه فرق  جزئين او تلاتة من الثانية لصالح Y7 Prime بس مش فرق كبير لكن الرخم ان بصمة الJ6 Plus مش بتتعرف على الصباع بسهولة 

تانى حاجة ان الJ6 Plus بيدعم نضارات الواقع الافتراضى من خلال الGyroscope Sensors اما فى ال Y7 Prime مش بيدعم كده واخر حاجة هنأكد عليها ان الموبايلين بيدعمو تركيب شريحتين زائد منفذ للذاكرة الخارجية بشكل منفصل 

وبكده نقدر نقول ان مفيش موبايل قدر يحسم الكفة لصالحه بشكل كبير و الموبايلين يعتبرو متكافئين معا وجود بعض الميزات زى ما وضحنا ولمزيد من اخبار التكنولوجيا تابعونا من هنا