حليت مشكلة نقص المياة في بي ام دبليو BMW E46 حل نهائي بس خد بالك

طلعت علي الحرفيين عشان اشتري الخرطوم الموضوع بقي مش محتاج اروح لواحد يشتغلني ويعمل عليا مصلحه في ثمن قطعه الغيار وكمان تركيبها زي مانتوا عارفين 

اول ما وصلت الحرفيين سالت ميكانيكي مشهور جدا هناك متخصص في البي ام   الخرطوم ده يعمل كام قالي يعمل 500 ج   

قولتله تمام هروح اشتريه قشطه 

لفيت شويه مش كتير وسالت واحد واتنين لحد لما لقيت واحد معروف جدا  ربنا يباركله راجل محترم جدا واسعاره كويسه وحاجته نضيفه جبته من عنده ب 200 ج بس 

انا وصلت الحرفيين متاخر كانت الساع 9 تقريبا وعلي ما جبت الخرطوم كانت الساعه بقت 10 بليل وطبعا كله بيقفل 

كل ده كوم واللي جاي كوم تاني  دخلت علي واحد بدون ذكر اسمه  الله يسهله فضل يتنك عليا شويه ويقولي تعالي الصبح مش فاضي ومعنديش حد يركبه وبعد محايله مني والله يباركلك هروح ازاي الخرطوم اللي راكب خلاص بيفنش واكيد هيقطع من في الطريق 

المهم وافق يركبه - المعلم بقي مش يصبر لحد ما العربيه تهدي شويه لا حط ايده علي طا الردياتير وبيفك لقيت نفسي ماسك ايده وبقوله بتعمل ايه راح باصصلي كده بزهول وبيقولي ايه يا باشا مالك انت هتعرفني شغلي ولا ايه طب اقولك معنديش حد يشتغل في عربيتك مع السلامه يا بيه 

طبعا انbتوا عارفين ايه اللي كان هيحصل اول ما الباشا يفتح غطا الردياتير وهي العربيه سوخنه وفيها ضغط 

اولا المايه السوخنه كانت هتطلع مره واحده في وشه وصدره ومش بس كده هيدخل هوا للماتور ويبوظ الجوان وممكن يجيب اجل الموتور في حركة زي دي لان ببساطه لو شوفت اي غطا ردياتير هتلاقي مكتوب عليه DONT OPEN IT WHEN HOT ودي معناها متفتحش الغطا والماتور سخن 

المهم لقيت نفسي بشيل ايده من علي الموتور وخدت العربيه ومشيت 

المصيبه بقي اني روحت لواحد بعده وعمل نفس الحركه وبرضوا كان رد فعلي التلقائي اني مسكت ايده قبل ما يفك الغطا ومشيت وانا حاسس اني مش طبيعي وبكلم نفسي وبقول يا ولاد ال........ ما الغطا اهو مكتوب عليه DONT OPEN IT WHEN HOT !!!! امال ايه مالكوا ؟؟؟؟ 

واخيرا روحت لواحد محترم اول ما فتح الكابوت جس الموتور لقاه سخن راح مريح المسمار بتاع الهوا شويه عشان الهوا يخرج ونبرد ال عربيه 

وبعد نص ساعه تقريبا العربيه هديت ومبقاش في ضغط هوا في الموتور ففتح غطا الردياتير وففضي المياه منه 

لسه طبعا الموتور سخن استني حوالي ساعتين لحد لما مؤشر الحراره نزل عند الخط الازرق ومعناه ان الموتور برد 

قالي دور العربيه وابتدي يحط مياه طبعا بعد ما كان خلع الخرطوم القديم وركب الجديد 

وهو بيحط المايه ايده التانيه ماسك بيها مفك علي مسمار الهوا عشان ياخد الهوا من الموتور والمايه داخله اول ما مسمار الهوا بدا يطلع مايه ربطه وقفل غطا الردياتير 

الدروس المستفادة
1- اشتري قطعة الغيار بنفسك من حد مضمون واسأل في كذا مكان الاول 
2 - متسبش اي حد يعك في عربيتك لمجرد انه فاتح ورشه وشغال ممكن اصلا يكون بيتعلم فيك وفي غيرك وهو ولا بيفهم ولا حاجه 
3- بالنسبه لموضوع نقص المياة ده اساسي تشيك المياه كل يوم هي روح الموتور ولو في اي مشكله لازم تتحل بسرعه ومتسبهاش لحد ما تكبر وتضطر تغير دورة المياة كلها 

لو الموضوع عجبك ماتنساش تعمل شير عشان غيرك يستفيد